俾人搶怪物

話說我而家打FFXI做緊一個任務，要打三隻好耐先出現一次既怪物，拎佢地身上既物品，其中兩隻因為冇乜人爭，好早就打死左(其實有一隻係上年打死既，係一隻鳥，但係當時未接到任務)，跟住上個禮拜接到任務，就去打其他兩隻，老虎同埋植物怪，老虎一去到就出現左，但係打第一次竟然唔掉個物品比我，咁我再等多兩日，第二次出現就比我物品，虎牙。好啦，打最後一隻，第一次去係星期日早上，去到有4-5個人等緊佢出黎，咁我就係度等呀等，無聊之際見到枱頭有張月結單，嘩 $17xx，咁我見怪物未出黎，竟去銀行個網睇睇夠唔夠錢找數，就o係我連銀行個網址都未打完既時候....就聽到打鬥聲，心知不妙，一轉番過去就睇到隻怪物比人打緊，咁我記住個時間，就離開左個地方。呢隻怪物每21-24小時出現一次，所以星期一會係9:00-12:00出現，我改左星期一唔番工，就係為左呢隻野。咁琴日我就一早起等啦，點知又係比人搶左。激死!
但係星期二一定要番工啦，唯有叫個ffxi既friend今日7:15至10:15盡盡人事幫我等囉。